Apat ka mga solar-powered Closed-Circuit Television (CCTV) cameras ang gin-install sang Bacolod City Disaster Risk Reduction Management Office (CDRRMO) kag Department of Public Services (DPS) sa apat ka bahin sang Central Market sini nga adlaw.
Ang amu nga mga CCTV cameras ang gin butang sa ginsang-an sang dalan Gonzaga-Bonifacio, Gonzaga-Gatuslao, Gatuslao-Luzuriaga kag Luzuriaga Bonifacio.
Pahayag ni Engr. Joel Vergara, Assistant Department Head sang DPS, gin-install ang mga CCTV cameras agud i-monitor ang paghaboy sang basura gikan sa sulod sang merkado.
Isa man ini ka tikang agud ma monitor sang ila talatapan ang mga indi makolekta nga basura sa palibot sang merkado agud mapalab-ot gilayon sa pribado nga kontraktor sang manughakot sang basura nga amu ang IPM-Construction and Development Corporation, suno pa kay Vergara.
Ang nasambit nga mga CCTV cameras ang gin-donate sang IPM-CDC.
